A l’envit de la Region, Lo CIRDOC - Institut occitan de cultura, l'Ofici public de la lenga occitana, Lo Congrès permanent de la lenga occitana, convidats per La Region Occitania / Pirenèus - Mediterranèa, qu’èran deu 17 au 22 de seteme a Sent Gaudenç en Comenge, a un eveniment màger : Las Pirenencas (Les Pyrénéennes), hèira agricòla triennau qui s’a ganhat la plaça au demiei de las manifestacions bèras de França e qui a un arrajament transfronterèr.
La hèira qu’a l’objectiu d’avalorar e de desvolopar las cordèras agricòlas de l’ensem deus Pirenèus, francoespanhòus e andorrans. Que favoriza e que hè la promocion d’encontres entre lo monde agricòle, la joenessa e lo gran public dab mustras, exposants, concors, conferéncias e animacions.
Las institucions occitanas qu’i èran atau aplegadas sus un taulèr de la Region Occitania, entà arcuélher lo public e har vàler la lenga e la cultura occitanas. Tanben que’s presentèn las divèrsas realizacions en matèria de lenga e cultura occitanas e catalanas : mustra, aplicacions mobilas, tutoriaus videos, dispositiu de clucs musicaus ... Qu’èran tanben presents los d’Eth Ostau Comengés qui animavan un taulèr dab videos de collectage, jòcs tradicionaus gascons e practicas agricòlas.
Ua operacion qui’n harà seguir d’autas, ce disón los participants !