Lo Congrès acaba d'enregistrar a Lingua Libre los mots del Basic, son lexic elementari francés-occitan. Son uèi mai de 20 000 formas occitanas que se pòdon escotar sus Wikimedia Commons.
Lingua Libre es una bibliotèca d'enregistraments audios a la quala cadun pòt contribuir. Prepausa un estudio d'enregistrament en linha, e los sons generats son automaticament versats sus Wikimedia Commons, una banca de fichièrs liures de dreits.
Dins la mira d'aver mai de lenga occitana que se pòsca escotar sus Internet, Lo Congrès a aviat una operacion d'enregistrament dels mots occitans contenguts dins sos diccionaris. Comencèt pel Basic, e podètz ara escotar en linha los mots occitans que conten. Los podètz tanben tornar utilizar a volontat, a condicion de ne citar l'autor.