Que n’i va aver de nau entà las tecnologias de la votz en occitan ! En efèit, los abans darrèrs en Intelligéncia artificiau que'ns permeten de considerar navèths desvolopaments dab ressorsas limitadas : dinc a uei lo dia, entà obtiéner ua votz sintetica, enter 6 e 10 òras d'enregistraments votz-tèxte alinhats que hasèvan besonh entà cada votz. Uei, l'IA que permet a l'entorn d'un sol motor d'agregar votz navèras dab un petit còrpus (1 òra d'enregistrament haut o baish).
Après las duas prumèras votz enregistradas en 2019 e 2020 (gascon e lengadocian), lo Congrès, l'universitat de Lhèida, en associacion dab la cooperativa catalana Col.lectivat, e la fondacion basca Elhuyar qu'an alavetz engatjat un programa navèth, LINGUATEC-IA, entà hornir navèras votz en aranés, gascon e lengadocian. Mei d’ua session d'enregistrament qu'estón atau realizadas en vath d'Aran e en Bearn, los utilizators que poiràn retrobar au segond semèstre 2026 las votz dens l'aplicacion Revirada (qui permet ua sintèsi après ua traduccion) atau com dens ua futura aplicacion dedicada Votz.
Tèsts que son tanben prevists dab còrpus gessits de libes audio deus quaus esperam que la qualitat d'enregistrament e l'evolucion de las tecnologias poiràn compensar l'expressivitat deu legidor (la sintèsi vocau necessita meilèu votz neutras).
Fin finau, los partenaris qu'an contunhat los desvolopaments entau transcriptor automatic a viéner, qui mercés a un traductor embarcat permeterà la transcripcion multilingüa de vidèo, un desvolopament hòrt esperat quan se coneish l'enjòc de difusion de contengut en occitan suus hialats sociaus.
LINGUATEC-IA qu’ei un programa finançat a 65% peu programa Interreg VI-A Espanha-França-Andòrra (POCTEFA 2021-2027). Lo POCTEFA qu’a l’objectiu d’ahortir l’integracion economica e sociau de la zòna frontalèra Espanha-França-Andòrra.