Ua purmèra en Bearn :
Aqueth dijaus 15 d'octobre de 2020, l'Ofici public de la lenga occitana (OPLO) qu’avia lo son dispositiu Libe-Libre !, un chèc-libre dedicat a las òbras joenessa en occitan.
Entau purmèr còp, cada mainat escolarizat en seccion bilingua a paritat orària o immersiva occitana que poderà profieitar d'ua ajuda de 20 € per la crompa d'ua o mantuas òbra(s) joenessa en occitan.
Concrètament, la crompa de las òbras que’s hè sus la basa d'un catalògue on se tròba la totalitat deus títols seleccionats. Las modalitats de crompa que son determinadas per l'escòla de l'escolan : gropament de las comandas, arcuelh deus librèrs dens las escòlas, crompas individuaus entà las familhas. L’auhèrta qu’ei valabla un mes e miei e que s'acabarà lo 30/11/2020.
1 300 escolans concernits en Bearn
En Bearn, 34 escòlas qu’an recebut los lors lòts de chècs a balhar aus escolans (Acós, Artigaloba, Artics, Asson, Bedós, Biost, Bidaishe, Bòrdas, Coarrasa, Espuei, Gan, Garlin, Aigon, Lagòr, La Seuva, Lescar, Lis, Masèras-Leson, Maseròlas, Monenh, Morlaàs, Auloron-Senta Maria, Ortès, Pau, Porciuvas -Bocoa, Salias e Sauvanhon).
En tot, 1 300 escolans que poderàn beneficiar deu dispositiu dens lo departament.
Los libes que poderàn estar crompats, mercés ad aqueth chèc, dens librerias independentas :
• LIBRERIA LE MOMENT LIBRAIRIE - 3 Plaça deu Bajar – Salias ;
• LIBRERIA L'ESCAMPETTE - 19 Carrèra deus Corderèrs – Pau ;
• LIBRERIA L'ESCAPADE - 16 Carrèra de la Catedrau – Auloron Senta Maria.
Ua experimentacion a la pagèra de Navèra Aquitània
Lo dispositiu Libe-Libre ! qu’ei gessit d'un partenariat dab l'associacion de las Librerias independentas de Navèra Aquitània (LINA) qui amassa mei de 100 librerias aderentas dens tota la region. Qu’ei sustot poduda vàder mercés au sostien financièr excepcionau de la region Navèra Aquitània (55 000 €).
« Que s’ageish d'un dispositiu experimentau, qui pertòca los dròlles escolarizats en mairau e elementari capvath las academias de Bordèu e Lemòtges, c’explica Charline Claveau, presidenta de l'OPLO e conselhèra regionau. Los ensenhaires e los parents d'escolans que’ns sollicitavan entà trobar un mejan de’us acompanhar entà aquesir òbras en occitan a fins ludicas, entà casahens. Dens lo contèxte complicat qui coneishen los librèrs, un partenariat dab las librerias independentas de la region que ns’a semblat naturau ».
Ua avaloracion deu dispositiu que serà establida a la fin de l'operacion. Si n’ei concludenta, que poderà estar tornada apitar l'an qui vien.