Lo Congrès e ELEN organizan lo 8 d'abriu venent, al Palais del Luxemborg a París, una jornada d'estudi sus las lengas regionalas.
A París, aqueste 28 de genièr, l’annada 2019 es estada proclamada annada internacionala de las lengas autoctònas - regionalas per França - per l’UNESCO, en seguida d’una decision de las Nacions Unidas (ONU).
E al meteis temps, constatam en França :
- una regression en cors sens precedent de l’ensenhament de las lengas e culturas dichas regionalas - notadament de l’occitan - amb d’un costat una reforma del licèu e del BAC que demesís las possibilitats d’aprendissatge e desvaloriza las que demòran ; e de l’autre una plan fòrta reduccion dels mejans dins totas las formas d’ensenhament ;
- la discussion d’un projècte de lei dicha « de l’escòla de la fisança » que, dins sa version iniciala, doblidava gaireben las lengas regionalas.
Reforma del licèu e novèla lei se fan sens prene en compte :
- la reconeissença per la constitucion (article 75-1) de las lengas de França coma patrimòni a aparar ;
- las avançadas de la lei de refondacion de l’escòla de 2013 ;
- las convencions signadas amb las regions ;
- las convencions internacionalas ;
- los engatjaments del President de la Republica.
Fàcia a aquela dobla menaça per las lengas de França, la coordinacion ELEN, Malhum europèu per l’egalitat de las lengas, s’es associada amb lo Congrès Permanent de la lenga occitana per organizar una jornada d’estudi e de debat per las associacions e pels elegits.
Trobaretz çai-jos un ligam de cap al programa d'aquela jornada. Serà Felip Martel que presentarà « Evolucion dels textes e de las possibilitats d’ensenhament de las lengas regionalas : de la dubertura progressiva a la barradura brutala ? »
Vos demandam doncas :
- de venir participar se podètz. Doblidetz pas de portar la vòstra carta d’identitat. Per se marcar, basta de donar lo vòstre nom a V. Rivière :
Cette adresse e-mail est protégée contre les robots spammeurs. Vous devez activer le JavaScript pour la visualiser. - de motivar los vòstres senators e deputats a participar o a se far representar per lor estacat parlamentari a la jornada d’estudi.
- de contribuïr a informar la premsa sus aquela jornada.
Vos mercejam plan.
Pel Conselh d'administracion del Congrès, lo President
Gilabèrt Mercadièr