Los 5 e 6 d’octobre, Òlt e Garona ven la capitala de las lengas e de las culturas regionalas.
Lo breton, l’alsacian, lo catalan, lo creòl, lo futunian e plan d’autras lengas rasonaràn e cantaràn en país occitan.
En efièch, Agen aculhirà los Rencontres professionals de las lengas e culturas regionalas, un eveniment organizat conjonchament pel departament d’Òlt e Garona, la vila d’Agen e la region Novèla Aquitània. Dos jorns inspirants e ont las diversitats lingüisticas seràn a l’onor.
Jos l'impulsion de Marcel Calmette, conselhièr departamental d'Òlt e Garona delegat a las lengas regionalas e de Jean-Luc Armand, conselhièr regional de Novèla Aquitània delegat a las lengas e culturas regionalas e president de l'Ofici public de la lenga occitana (OPLO), l'idèa d'iniciar un eveniment a raionament nacional a l'entorn de las culturas e lengas regionalas espeliguèt. Capitèron a federar la region Novèla Aquitània, lo departament d'Òlt e Garona, la vila d'Agen, l'OPLO e las associacions occitanas localas, totas sòcias del collectiu Quinzena occitana, per prepausar dos jorns d'escambis, de reflexions, de trabalh e de rencontres… Un grand mercé a eles e als actors mobilizats d'aver fach mòstra de volontat e de creativitat per aquel rendètz-vos excepcional !
Las collectivitats localas s'engatjan per la defensa e la promocion de las lengas e culturas regionalas, acompanhan los actors qu'òbran, imaginan, agisson tot lo long de l'annada dins aquel domeni ; aqueles dos jorns son una resulta, un novèl vam balhat a las lengas e culturas regionalas mas sustot un luòc d'amassada e d'escambis de las fòrças vivas dels territòris.