Com anonciat au parat deu son capítol de Nadau, l'Academia gascona de Baiona-Ador que lança lo son prumèr concors literari de las Hèstas de Baiona.
Aqueste concors entau quau las òbras deuràn estar redigidas exclusivament en lenga occitana gascona que’s compausarà de 2 categorias :
- Lo concors licean, qui pertòca escolans escolarizats en collègis o licèus. Lo vencedor que receberà un prèmi de 300€, e dus premiats que receberàn un prèmi de 150€
- Lo concors adultes entau quau lo vencedor receberà un prèmi de 700€ e 4 premiats un prèmi de 150€
Las òbras premiadas que haràn l'objècte d'ua edicion papèr e que seràn consultaderas suu site de l'Academia Gascona.
Ua jurada de 5 personas que serà en carga de despartir los concurrents.
Los prèmis que seràn remetuts dens l'encastre de l'Estanquet gascon de las Hèstas de Baiona, au sèti de l'Academia Gascona, dijaus lo 27 de Julhet.
Que s'ageish d'escríver ua novèla braca (maximum 5 paginas o 10 000 signes) o un poèma a l'entorn deu tèma de las Hèstas de Baiona.
Los candidats que deuràn har arribar la lor òbra (acompanhada deus documents detalhats dens lo reglament complet) a l'Academia Gascona abans dissabte lo 29 d'abriu a miejanueit. Ne serà pas acceptada qu'ua sola òbra per concurrent.
Las òbras que's poiràn mandar per corric a l'adreça seguenta :
Que's poirà har tanben per corrièr (letra seguida) a l'adreça seguenta :
Academia gascona de Baiona-Ador
4 carrèra deu Molin
64100 Baiona
Aqueth prumèr concors literari en lenga occitana gascona que vien completar la proposicion deu concors Lo basco e la pluma qui ne s'adreçava pas qu'a escriuts en francés o en basco. Dens ua vila e ua comunautat d'aglomeracion qui a l'escadença de beneficiar e d'aver reconeishut l'oficialitat de duas lengas regionaus suu son territòri, ne seré pas estat admissible que l'ua d'aqueras lengas e sii desbrembada.
L'Academia gascona, qui hè sola l'esfòrç financèr de s'adaptar augan au reglament de l'aute concors literari, qu'ei de segur plan dispausada a integrar lo Calam deu Hestaire dens las annadas a viéner dens un concors literari comun aus 3 idiòmas parlats a Baiona.
L'Academia Gascona Baiona Ador ne desbremba pas tanpòc lo concors literari en lenga occitana gascona que prepausa despuish 30 ans l'associacion anglòia Ací Gasconha, concors dotat per las vilas d'Anglet, de Baiona, de Tarnòs, peu Congrès permanent de la lenga occitana mes tanben per la quita Academia gascona.
Dens la mesura que los tèxtes prepausats au Calam deu Hestaire seràn compatibles dab lo reglament deu concors d'Ací Gasconha, arren ne defen pas que siin presentats au còp aus dus concors.
Mei ua lenga regionau se parla, s'escriu e s'ensenha, mei las nostas culturas francesa, basca, gascona e s'enriqueishen e que's neureishen de las lors diferéncias.
Lo reglament complet d'aqueth concors aperat lo Calam deu Hestaire qu'ei accessible e a telecargar suu site de l'Academia Gascona a l'adreça seguenta :