Lo noven Obrador de lingüistica occitana (OLO9) se tendrà a Tolosa, a l’universitat Tolosa-Joan Jaurés, los 12 e 13 de junh de 2025. L’Obrador de lingüistica occitana es lo fòrum que recampa totes los lingüistas que trabalhan sus l’occitan, dins un esperit d’escambi e de collaboracion.
Las proposicions de comunicacion son de mandar abans lo 31 de genièr de 2025. L’acceptacion serà notificada abans lo 28 de febrièr de 2025.
S’acceptaràn de comunicacions sus la lingüistica occitana, dins de perspectivas tant diacronicas coma sincronicas, enclauses la lingüistica de l’estructura de la lenga (lexic, fonologia, morfologia, sintaxi, semantica, pragmatica), la sociolingüistica, l’estudi dels dialèctes, la lingüistica otilhada de l’occitan e tot autre aspècte de l’estudi de la lenga occitana, sola o dins sos rapòrts amb las autras lengas romanicas.
Las comunicacions duraràn vint minutas, seguidas de dètz minutas de discussion. Emai se s’encoratja las comunicacions en occitan, las autras lengas romanicas e l’anglés seràn tanben admesas.
Los actes de l’Obrador seràn publicats en revista electronica.