Deu 4 au 6 de deceme, Lo Congrès que participè a IA Pau, un hestau arron l'intelligéncia artificiau qui's hè tot an a Pau, e qui's debanè augan en version numerica.
Que participè purmèr a l'organizacion en bastir l'interfàcia web de l'eveniment. En efèit, en mei deu dirècte video, IA Pau que perpausè salons de pausa en visioconferéncia, informacions interactivas sus l'eveniment, un chat tà que los participants e poscan comentar l'eveniment...
Mes Lo Congrès que hasó tanben partida de las estructuras qui presentèn un subjècte tau datachallenge. Que s'ageish d'ua competicion destinada aus estudiants. Enterpresas que hèn demandas d'utís e que hican a disposicion dadas tà'us bastir. Los estudiants qu'an dus dias tà desvolopar quauquarren, e los qui mei plan an tribalhat que receben prèmis.
Augan, Lo Congrès que'us dè lo desfís de realizar un PoS-tagger e lematizaire en occitan. Qu'ei un utis qui, tà cada mot d'un tèxte, e balha la soa categoria gramaticau e lo son lèma (l'infinitiu taus vèrbes, lo masculin singular taus adjectius...).
Duas equipas qu'ensagèn de s'i har. Ua d’enter eras que s'i escadó de plan, e qu'emportè au còp lo dusau prèmi e lo prèmi especiau environament. L'equipa Buddhisteam que perpausè Outilocc, un utís qui pòt dar la categoria gramaticau d'un mot dab 80% de precision, indicar lo son lèma dab 90% de precision, mes tanben predíser lo mot seguent a un utilizator qui pica tèxte, e tréger mots-claus d'un document.
L'utís qu'avè la particularitat de perpausar un mòde « estauvis d'energia », dab resultats mensh bons mes un bilanç carbona mei baish. L'utís que s'ameritarà d'estar drin mei tribalhat tà poder estar publicat, mes çò dejà hèit qu'ei hèra prometedís.