Lo 17 de setembre, la Generalitat de Catalonha a atribuit lo prèmi Robèrt Lafont 2026 a Calandreta.
Creat en 2010, lo prèmi Robèrt Lafont recompensa las personas e las entitats que se remarcan per la defensa, la promocion e lo raionament de l’occitan dins l’ensemble de son airal lingüistic.
La jurada, presidida pel conselhièr de Politica Lingüistica F. Xavier Vila, a causit Calandreta a l’unanimitat demest quatre candidaturas. Volguèt saludar son implantacion territoriala, la continuitat de son accion educativa e sa capacitat de recampar un collectiu larg a l’entorn de la lenga, en ligam amb d’autras entitats occitanas.
La ceremònia de remesa del prèmi èra presidida pel conselhièr F. Xavier Vila e presentada per la jornalista aranesa Ares Riu. Aculhiguèt las intervencions de Joan-Loís Blenet, president de Calandreta, de l’occitanològ Jaume Figueras e de l’artista marselhés Rodín Kaufmann. Un moment de rescontre e de mesa en valor de la lenga e de la cultura occitanas.