Lo portau de la petita enfança e deus ben.hèits deu bilingüisme doriu francés-occitan qu'ei d'ara enlà public.
Aqueth portau qu’arrepresenta dus ans de tribalh collectiu a la demanda deu Departament deus Pirenèus Atlantics, dab mantua institucion aliada : CFPÒC Navèra Aquitània (formacion deus professionaus e cors taus parents), Òc Bi Aquitània (testimoniatges de parents, sensibilizacion deus professionaus de las ninoèras), lo CAP'ÒC (ressorsas pedagogicas), Conta’m (ressorsas audiovisuaus), ÒCtele (tutoriaus video), Letras d’òc e Per Noste taus albums joenessa… Lo Congrès permanent de la lenga occitana que’n hasó l’engenheria, la coordinacion la concepcion tecnica e la realizacion deus lexics.
Ninon que perpausa ressorsas entaus parents e professionaus qui vòlen hicar lenga en la vita vitanta deus mainadons : vocabulari, catalògue de ressorsas (istuèras, cançons, activitats), panoplias tematicas, annuari de professionaus, videos qui representan scènas de la vita vitanta. Quau que sian lo vòste nivèu en occitan, l’intensitat immersiva desirada e los metòdes qui voletz emplegar, ací qu’avetz çò qui cau.
Que s’i parla d’ua purmèra tà las lengas de França, lo Congrès que pensa de har ua declinason tà varietats mei de l’occitan.