Lo CNRS, l’Universitat Còsta d’Azur e lo Congrès permanent de la lenga occitana que sòrten de signar ua convencion de partenariat de compte har !
Concrètament, que s’ageish d’un contracte de collaboracion de recèrca dab lo laboratòri Basas, Còrpus, Lengatge (BCL) de l’Universitat Còsta d’Azur, intitolat « Mesa en interaccion deu Thesoc e de la platafòrma numerica locongres.org : comunicacion tecnica, interoperabilitat e partatge de dadas ».
Lo Thesoc qu’ei ua basa bèra qui amassa dadas tiradas deus atlàs lingüistics : dadas e quasèrns d’enquistas, enregistraments sonòrs e videos e documents iconografics. Que caben dadas en lo maine de la lematizacion, de la morfologia de l’etimologia, etc.
Aqueste programa d’accion qu’a per mira de har mei interoperablas las interfàcias deu Thesoc e de dicod’Òc, peu mejan de remandaments mutuaus de ligams cap a las ressorsas mei pertinentas e en emplegar las API desvolopadas sia peu Congrès sia peus cercaires deu Thesoc.
Pendent cinc ans de temps, las equipas deu Congrès e deu Thesoc que van doncas collaborar en integrar las ligasons Thesoc > dicod'Òc e dicod'Òc > Thesoc a las lors platafòrmas respectivas mes tanben melhorar la lematizacion deu Thesoc, armonisar los lèmas deu diccionari d’Alibèrt e hornir lèmas presents dens lo diccionari deu Simin Palay, enter autas accions.
Un chantièr deus bèths entà melhorar la numerizacion e la documentacion de la lexicografia occitana.