L'In'Òc d'Aquitània qu'organizè los sons Encontres literaris internacionaus deus 2 penents deu 8 au 10 de noveme, a l'escadença deu Salon deu libe de Pau. Augan, la tematica qu'estó la traduccion.
Aqueth tèma qu'èra d'actualitat, dab la recenta publicacion de la Bíblia en occitan. Joan Larzac, l'autor d'aquera traduccion, que parlè d'aqueth tribalh son lo matin deu dissabte 9. La velha, ua taula redona qu'èra organizada suu tèma : « arrevirar, crear o traïr ? ». Qu'i participèn autors e traductors d’expression occitana com Danièle Hoursiangou, Rotland Pecot e Joan Larzac, la basca Aurelia Arkotxa, Carlos Castán entau castelhan e l’escrivana de lenga francesa Emmanuelle Urien. Las discussions que las animè Philippe-Jean Catinchi, jornalista au Monde des livres. Que i avó tanben lecturas musicaus e signaturas au long d’aqueths tres dias.
Despuish un sarròt d’annadas, l'In'Òc, dab los Encontres deus 2 penents, qu’assegura ua preséncia de la cultura occitana au sen de l’eveniment literari qui constitueish lo salon deu libe de Pau.