Lo 12 de decembre de 2025, lo Congrès permanent de la lenga occitana a adreçat al ministre de l'Educacion nacionala un corrièr qu’alèrta sus mantuna imprecision relevada dins de documents institucionals recents, sustot los questionaris budgetaris dels PLF 2023, 2024 e 2025, aital coma de supòrts difusats dins l'encastre d'òbras parlamentàrias e de publicacions publicas.
Aqueles documents presentavan de denominacions dialectalas coma de lengas distintas e prepausavan de chifras d'efectius alunhats dels constats establits per las acadèmias e per l'Ofici public de la lenga occitana.
Dins aquel corrièr, lo Congrès tornava dire que la lei Deixonne, lo rapòrt Cerquiglini de 1999 e l'ensemble de las òbras scientificas de referéncia reconescan l'occitan — o lenga d'òc — coma una lenga unitària, estructurada en mantuna varietat mutualament comprensibla. Soslinhava tanben que la terminologia oficiala utilizada pel CAPES e l'agregacion d'occitan-lenga d'òc confirme aquela unitat, reconeguda tant per las institucions coma per la comunautat scientifica internacionala.
Enfin lo Congrès atirava l'atencion del ministèri suls risques qu'aquelas imprecisions fasián pesar sus la percepcion publica de la lenga, sus la coeréncia de las politicas educativas e sus la credibilitat de las donadas institucionalas. Demandava en consequéncia la correccion dels documents concernits e lo restabliment de la terminologia unitària en vigor.
Dins sa responsa datada del 12 de febrièr de 2026, lo ministre de l'Educacion nacionala, lo sénher Édouard Geffray, pòrta de garantidas explicitas. Indica que prenguèt coneissença « amb atencion » de las interrogacions formuladas pel Congrès e afirma velhar personalament a l'usatge, per sos servicis, de « l'accepcion unitària de la lenga occitana, tala coma defenduda per vòstra estructura ».
Precisa tanben que transmetèt la correspondéncia a la directritz generala de l'ensenhament escolar, per fin qu'una vigilància particulara siá portada a la terminologia utilizada dins los documents oficials.
Aquela presa de posicion constituís un senhal important per l'ensemble dels actors de la lenga d'òc : reafirma la reconeissença institucionala de l'unitat de la lenga occitana e confirma la posicion del ministèri de l'Estat.