Lo 1èr de julhet passat a Baiona, que’s hasó lo Congrès Transfrontalèr Lengas minoritàrias e intelligéncia artificiau. Un espiar sus l'aviéner de las duas parts deus Pirenèus enlà, organizat dens l'encastre deu projècte LINGUATEC-IA.
La jornada que debutè dab l'intervencion d'Amaia Armendáriz Lasso (gestionària de la Comunautat de tribalh deus Pirenèus - Interreg POCTEFA), qui metó en valor l'importància de la collaboracion deus organismes deus dus costats deus Pirenèus.
Puish que vienón las conferéncias balhadas per Quim Barnola (coordinator de las lengas oficiaus e minoritàrias de RTVE) seguit per Lionel Buannic (director d'ÒCtele e de Brezhoweb) qui expausèn lo lor punt de vista tà çò deus desfís qui deven relhevar las lengas minoritàrias dens los mèdias televisuaus, atau com las oportunitats que’us auhereishen l’IA au dia de uei.
Itziar Cortés (coordinatora deu projècte Linguatec-IA e representanta d'Elhuyar) que presentè en seguir las possibilitats auhèrtas per la platafòrma de doblatge automatic desvolopada dens l'encastre deu projècte. Que s’i preved de melhorar progressivament las tecnologias presentadas dens aquera demo en foncion deus progrès obtienuts dens cada lenga.
Puish qu’estón expausats los itineraris de tribalh prevists per membres deu consòrci Linguatec-IA entà las lengas dab las quaus tribalhan : las conferéncias sus l'occitan qu’estón asseguradas per Aura Séguier (Lo Congrès) e Myriam Bras (Universitat Tolosa Joan Jaurés) ; Helena Torres-Purroy (Universitat de Lhèida) que parlè de l'aranés, e Aitzol Astigarraga (Orai NLP Teknologiak – Elhuyar) deu basco.
Lo vrèspe Urtzi Etxeberria (IKER-CNRS) e Benaset Dazéas (Lo Congrès) que moderèn ua taula redona compausada de representants politics de Novèla Aquitània e de Navarra : Mathieu Bergé (representant de la region Novèla Aquitània) e Javier Arakama (director gerint d'Euskarabidea- Institut navarrés deu basco).
La jornada que s'acabè per ua ceremonia d'actualizacion e de signatura deu manifèste deu Hialat d'Excelléncia Transfrontalèr en Intelligéncia Artificiau orientada au Lengatge peu consòrci deu projècte Linguatec-IA.