Lo projècte Linguatec-IA que comencè en genèr de 2024 e los purmèrs resultats que començan d’aparéisher d’ara enlà, ací dab lo desvolopament d’un modèle de lengatge ensenhat.
L’objectiu deu projècte Linguatec-IA qu’ei de facilitar la comunicacion multilingua enter los locutors qui parlan las lengas de las diferentas regions deus Pirenèus.
Dens aqueth encastre, qu’ei indispensable que las lengas desirosas de susvíver dens lo mond numeric e desvolòpen mejans tecnologics entad aquò har, e los modèles de lengatge que son adara los apèrs de basa deu procediment, qu’ei a díser modèles de lengatges capables de compilar, compréner e respóner a las demandas deus usatgèrs.
Los gigants tecnologics qu’an dejà en la lor possession modèles de lengatge ensenhats entà l’occitan, mes que’us apartienen e dab aquò que son eths qui prenen las decisions. La comunautat lingüistica occitana n’a pas nat poder entà influenciar aqueras decisions, qu’ei donc important qu’aquera comunautat e las lengas minorizadas deu son environament e desvolòpen los lors apèrs tecnologics pròpis entà poder decidir de la lor utilizacion e de la faiçon de quin son utilizats.
Atau, l’equipa de recèrca qu’a realizat dus ensais diferents e creat los dus prumèrs modèles de lengatge ensenhats. Xabier Arregi, cercaire deu centre HiTZ, qu’explica « qu’èm a avalorar la lor capacitat a realizar de faiçon satisfasenta las tascas qui’us hidam. Qu’èm adara en fasa d’avaloracion, que verificam per exemple lo lor foncionament tà çò de la traduccion automatica ».
Un aute deus objectius ultimes deu projècte qu’ei basat sus la creacion d’ua platafòrma de doblatge automatic enter las lengas minorizadas deus Pirenèus. Itziar Cortés, representanta d’Elhuyar e coordinatora deu projècte Linguatec-IA qu’afirma qu’en aqueth èish de tribalh « qu’avem dejà los purmèrs resultats. Qu’èm en ua fasa de demostracion d’ua platafòrma de sostitolatge automatic enter las lengas minorizadas deus Pirenèus ».
Lo projècte LINGUATEC-IA qu'ei finançat a 65% per l'Union Europèa peu programa Interreg VI-A Espanha-França-Andòrra (POCTEFA 2021-2027). Lo POCTEFA qu'a l'objectiu d'ahortir l'integracion economica e sociau de la zòna frontalèra Espanha-França-Andòrra.