Lo 19 de junh que vienó a Pau Michèle Andreani, navèra Inspectora generau a las lengas regionaus au ministèri de l'Educacion nacionau entà encontrar diferents actors en lenga occitana : lo CIRDOC-Institut occitan de cultura, lo CAPOC, l'Ofici public de la lenga occitana e lo Congrès permanent de la lenga occitana.
Acompanhada de Pascal Sarpoulet, Inspector pedagogic regionau occitan de l'Acadèmia de Bordèu, que podó visitar los burèus deu Congrès, on Gilbert Mercadier, president e Benoît Dazéas, director, e presentèn lo foncionament, las missions e las realizacions principaus de l'organisme interregionau de la lenga occitana : dicodòc, revirada, votz, lo DGILO (Diccionari Generau Informatizat de la Lenga Occitana, en cors de redaccion) atau com la version tèst de reconeishença vocau occitana.
Michèle Andreani - dejà usatgèra de revirada ce'ns digó ! - que solinhè la qualitat de las òbras deu Congrès, la pertinéncia deus apèrs e la lor utilitat entaus ensenhaires qui son, ce brembè lo president deu Congrès, los prumèrs usatgèrs deus nostes servicis e taus quaus avem suenh de respóner au mei pròche deus lors besonhs.