L’Universitat Tolosa-Joan Jaurés ven de crear un site internet batejat AutorÒc 16-18 que permet d’accedir a las numerizacions dels tèxtes d’autors occitans en lenga occitana o sus la matèria occitana del periòde modèrne (sègles XVI, XVII e XVIII).
Fòrça bibliotècas numerizèron de publicacions occitanas, en Occitània (CIRDOC-Institut occitan de cultura, Bibliotèca d’Estudi e del patrimòni de Tolosa, bibliotècas universitàrias de Tolosa…), en França (Bibliotèca Nacionala de França) o en Euròpa (Bibliotèca Nacionala d’Àustria, Bibliotèca de l’Estat de Bavièra…) e se’n tròba fòrça tanben sus Google Books. La recèrca d’aquelas numerizacions necessita sovent fòrça temps e paciéncia e lo sit permet d’accedir dirèctament a la ressorsa electronica. En mai d’aquò, de referéncias bibliograficas son donadas per conéisser l’istòria dels tèxtes e tanben de referéncias per penetrar dins la biografia de l’autor. Lo periòde modèrne es lo mens conegut dels grands periòdes de la cultura occitana, esquichat entre l’Edat Mejana e los trobadors occitans, d’un costat, e la Renaissença provençala e l’occitanisme dels sègles XIX e XX, d’autre costat. Pr’aquò, es un temps que vegèt espelir una creacion culturala rica e diversificada dins fòrça domenis (poesia, teatre, cançon, lexicografia, istòria…), marcada per de grands creators coma lo provençal Bellaud de la Bellaudiera, lo tolosan Pèire Godolin o lo bas-lengadocian Joan-Baptista Fabre.
Lo site AutorÒc, bailejat per Joan Francés Courouau, professor de literatura occitana modèrna e contemporanèa a l’Universitat Tolosa-Joan Jaurés (UT2J), es una realizacion del Pòl d’Ensenhament, Recèrca e Documentacion en Occitan e Catalan (PERDOCA), creat en 2021 per assegurar la coordinacion e la visibilitat de las activitats de recèrca e d’ensenhament ligadas a la matèria occitana o catalana dins aquela universitat. Recampa mai de 30 cercaires, mai de 30 projèctes de recèrca, 4 mastèrs, 3 licéncias e 4 bibliotècas.
Lo site AutorÒc 16-18 es destinat a s'enriquir progressivament en seguissent la progression de las recèrcas, de las publicacions e de las numerizacions menadas sus la matèria occitana de l'epòca modèrna. Es possible d'efectuar una recèrca a partir dels sègles, dels genres, dels departaments actuals o dels dialèctes.