La socializacion de la lenga occitana qu'a enfin lo son site : Lenga & societat !
Lenga & societat qu'ei lo pòle deu Congrès permanent de la lenga occitana dedicat a la socializacion lingüistica. Qu'ei un servici qui òbra a l'usatge e a la difusion de l'occitan dens l'espaci public e dens la societat. En s’emparant sus las soas atrunas numericas, lo pòle que prepausa ua auhèrta completa e personalizada a las collectivitats, enterpresas, associacions o enqüèra particulars qui desiran har compte de la lenga occitana a l'entorn de 5 èishs d'intervencion :
- Socializacion : produsir conselhs entà integrar la lenga occitana dens la comunicacion e las diferentas activitats de las estructuras.
- Traduccion : gràcias a un hialat de traductors, lo pòle Lenga & societat deu Congrès qu'assegura un servici de traduccion (traduccion de tèxte, traduccion simultanèa) enter lo francés e l'occitan (en totas las soas varietats).
- Toponimia : revelar lo sens de l'environament lingüistic en s’emparar suus traç qui la lenga occitana a deishats dens lo paisatge. Aqueras òbras que van de l'estudi toponimic a la mesa en plaça d'ua senhaletica bilingua en passant per accions de valorizacion e de mediacion au près deus abitants e usatgèrs.
- Terminologia : realizar lexics especializats tematics entà respóner aus besonhs de las activitats en lenga occitana miadas dens l'encastre de las politicas lingüisticas.
- Sensibilizacion : informar los elejuts, parlamentaris e territoriaus, suus drets, la realitat e los enjòcs de la lenga occitana entà que la prengan en consideracion dens las lors politicas publicas.
Aqueth site portau navèth qu'ei d'ara enlà un lòc unic d'accès aus nostes servicis e a las nostas atrunas, atau com un espaci-ressorsa on s’i tròba mantua de las nostas realizacions (campanhas de comunicacion, òbras toponimicas, lexics, etc.).
Quaus que sian las vòstas espèras e las vòstas demandas especificas, n'esitetz pas a contactar lo pòle Lenga & societat qui ei aquí entà vs'acompanhar dens los vòstes projèctes !