Lo conjugador occitan dau Congrès es d'aura en çai disponible per la varietat lemosina.
L-i son quasiment 9 000 verbes lemosins, classats e ordenats en 157 modèles, que ne'n podetz trobar la conjugason detalhada de l’indicatiu, dau subjonctiu, dau condicionau, de l’imperatiu e daus participis.
Après lo lengadocian, lo gascon e lo provençau, quò es la quatresma varietat de l'occitan perpausada per lo conjugador. Fuguet realizada jos la direccion scientifica de J.-L. Lévêque e en partenariat emb Novelum-IEO Perigòrd. Quò es un trabalh de dos ans que faguet Florença Marcouyre, lexicografa dau Congrès, emb l’ajuda de Danís Chapduelh, a partir d’òbras referencialas coma lo Basic (lexic referenciau francés-occitan), lo Dictionnaire normatif limousin-français de G. Gonfroy e lo Précis de conjugaison occitane de J.-L. Lévêque e J. Roux.
Podetz cerchar daus verbes a partir de lor infinitiu dins la partida Conjugasons dau Dicodòc (a l'adreiça dicodoc.eu) o dins l'aplicacion de telefonet Vèrbòc, disponibla per Android e per iPhone. Per l'enchaison, quela-quí fuguet actualizada. Perpausa aura una interfàcia novela, mai moderna e ergonomica, aitanben la possibilitat d'obténer la conjugason d'un verbe a l'azard.