Après aver obtienut la responsa de 7 candidats a l'eleccion presidenciau, lo collectiu #2017oc que sòrt de hicar en linha la part de la soa plataforma consacrada a las eleccions legislativas.
Tots los candidats que's pòden inscríver directament suu site 2017oc.fr tà respóner au questionari.
Arrés n'ac pòt pas ignorar : l'occitan-lenga d'òc, reconeishut com patrimòni de França dab las autas lengas regionalas, qu'ei « seriosament en perilh », entà tornar préner la terminologia de l'Unesco. Pas nat besonh de brembar los sons títols, desempuish los trobadors dinc a Mistral e lo son prèmi Nòbel, o los autes autors contemporanèus, estudiats capvath lo mond sancèr, e beròi ignorats en França. A revèrs de las acusacions ritualas de comunautarisme, l'occitan com las autas lengas de França que pòt estar « un utís de desvelopament intellectuau, lingüistic e culturau » averat.
E totun, a maugrat de quauquas avançadas dab la sinergia entre Estat e collectivitats territorialas, qu'ei clar que n'i demora hèra a har. Las instàncias internacionalas qu'arcastan tanben soventòtas a França, qui lauda e defen la diversitat au nivèu internacionau, tau son sostien hèra insufisent a la soa diversitat lingüistica e culturala.
Qu'ei donc temps que l'Estat assumesca enfin las soas responsibilitats e los sons devers entà transméter aquera ressorsa miaçada de la cultura nacionau. Qu'ei en aquera perspectiva que los representants deus actors de la sauvaguarda e de la transmission de la lenga e de la cultura occitanas e desiram conéisher la posicion deus candidats tà mantuns maines : ensenhament, politica lingüistica, patrimòni e creacion artistica, valorizacion de las lengas e e culturas regionaus.
Qu’avetz lo questionari complet, las responsas deus candidats a l'eleccion presidenciau e las prumèras responsas deus candidats a las eleccions legislativas suu site 2017oc.fr.
Contact
Corric :
Site : www.2017oc.fr
twitter : @2017oc
facebook : 2017oc