Lo Conselh departamentau de Garona Hauta qu’installa 75 panèus bilingües francés-occitan suus caminaus departamentaus, qui balhan la planvenguda a l’entrada de Garona Hauta.
Entà hèr compte de la varietat dialectala de l’occitan au departament, que son estats pausats en occitan gascon dens la part oèst deu departament (42 panèus : "Planvenguda en Hauta Garona") e en occitan lengadocian "Benvenguda en Garona Nauta" dens la sua zòna èst (33 panèus).
Aquera senhalizacion que mòstra l’estacament deu Conselh departamentau a la promocion de la lenga occitana e la sua volontat de n’assegurar la preséncia dens l’espaci public. Aquera accion que constitueish tanben un element de concretizacion deu sué plan departamentau a favor de la lenga e de la cultura occitanas aprovat en deceme de 2017. En aqueste que i caben ua seria d’accions a favor de l’ensenhament de la lenga e de la sua transmission, de la sua preséncia dens l’espaci public e de la difusion de la cultura occitana peus actors associatius o las diferentas direccions deu Conselh departamentau.
D’aulhors, senhalizacions bilinguas autas francés-occitan que son estadas aviadas en bòsc de Buset e suu camin Via Garona.
Lo Conselh departamentau de Garona Hauta que participa atau largament, dens l’encastre de las suas competéncias, a la promocion de l’occitan e deus sués dialèctes d’usatge, l’occitan gascon e l’occitan lengadocian. Daubuas subvencions acordadas a las associacions culturaus, educativas o teatraus, accions d’iniciacion o de formacion a destinacion deus agents deu departament e deus elejuts municipaus que son tanben estadas aviadas.
« La lenga e la cultura occitanas que son compausantas deu nòste patrimòni locau, qui ns’apartien de deféner e de valorizar. La civilizacion occitana que s’ei hargada a l’entorn de las valors de libertat, de tolerància e de respècte ; valors fondamentaus entà la convivéncia dont devem assegurar la perennitat », ce precisè Georges Méric, president deu Conselh departamentau de Garona Hauta. « Las diversitats culturaus que son un atot màger d’ua Republica democratica : que deven favorizar l’universalitat deus nòstes principis republicans e evitar tot replec identitari o comunautarista » ce concludí.