L'Euroregion Pirenèus-Mediterranèa a lançat son Apèl a Projèctes Culturals (APC) annal.
Aquel apèl a projècte s'inscriu dins la fuèlha de rota « Euroregion 2030 » e a per mira de contribuïr a la construccion d'un avenidor mai resilient, per la favorisation de la diversitat culturala dins l'Euroregion, la promocion d'una cultura euroregionala dobèrta al bacin mediterranèu, e lo refortiment de la solidaritat amb d'autres territòris.
L'apèl s'adreça a las entitats basadas en Catalonha, en las Illas Balearas e en Occitània. Per tal de favorizar la cooperacion e la diversitat, los projèctes devon implicar almens tres entitats, una provenenta de cada territòri membre. Enfin, las activitats eligiblas se devon debanar sul territòri de l'Euroregion.
Los projèctes pòdon portar sus d'activitats coma la creacion, la produccion, l'exposicion, la mediacion, la difusion, la valorizacion e la promocion del patrimòni, aital coma sus de procediments de numerizacion, dels escambis culturals e d'autras formas d'expression creativa. Pòdon tanben inclure d'iniciativas connèxas, coma la formacion e la gestion culturala. L'apèl a projèctes es dobèrt a totas las disciplinas dels sectors cultural e artistic.