De longa tòca las associacions de defensa de nòstras lengas e culturas dichas « regionalas » an menat d'accions en comun per far reconéisser e promòure la diversitat lingüistica de la Republica francesa dins l'Exagòn e mai Otramar. Amassadas a París en octobre de 2019, aquelas associacions, amb lo sosten d'elegits, se son constituïdas en collectiu que pren lo nom de « Pour Que Vivent Nos Langues » per denonciar las consequéncias deletèrias de la reforma del licèu mesa en plaça pel ministre de l'Educacion nacionala Jean-Michel Blanquer.
Uèi, mai que jamai, lo combat contunha e lo collectiu « Pour Que Vivent Nos Langues » a decidit de se constituïr en associacion lei 1901 per afortir son accion e sos mejans dins la lucha pels dreches lingüistics individuals e collectius dels locutors de las lengas dichas regionalas (ensenhament, mèdias, preséncia e usatge dins la vida publica). Aquela associacion serà compausada d'estructuras associativas representant la diversitat dels actors e actrises de las lengas regionalas suls territòris concernits, regropant d'estructuras de l'ensenhament public e associatiu, aital coma dels mitans culturals per l'occitan-lenga d'òc, lo basc, lo breton, lo catalan, lo còrs, lo flamenc occidental, l'alemand estandard e dialectal alsacian e mosellan, lo savoiard, las lengas d'oil dont lo gallo, lo peitavin-santongés e lo picard. Demòra largament dobèrta a las associacions que defendon la diversitat de lors lengas e lors culturas en particular dins los territòris d'Otramar.
En França, nòstras lengas resistisson per desaparéisser pas perque figuran totas a l'inventari de las « lengas menaçadas de disparicion » establit per l'Unesco. Malgrat lo vam mondial per que la diversitat culturala e lingüistica siá preservada al meteis títol que la diversitat biologica, malgrat los tèxtes internacionals que regisson los dreches de l'Òme e los dreches dels pòbles, malgrat lo vòte de la lei del 21 de mai de 2021 relativa a la proteccion patrimoniala de las lengas regionalas e a lor promocion (dicha « Loi Molac »), malgrat las mesas en garda de l'ONU e del Conselh d'Euròpa, l'Estat francés pren pas las mesuras e balha pas los mejans necessaris a la salvagarda e a la transmission del patrimòni immaterial millenari que son las lengas e las culturas nòstras. L'objectiu de l'associacion « Per que Viscan Nòstras Lengas » es de contribuïr a obténer aquelas mesuras e mejans.
Lo lançament d'aquela estructura novèla se debanarà en dos temps :
- Divendres 24 d'octobre : taula redonda « Dreches lingüistics e encastre juridic : ont ne sèm 4 ans aprèp lo vòte de la lei Molac ? » a la Cambra de comèrci de Baiona a partir de 14 H 30 (veire lo programa amb lo ligam aicí)
- Dissabte 25 d'octobre : amassada constituenta de l'associacion que lo sèti ne serà a Baiona.
- Ne saber mai