Lo dissabte 26 de setembre 2026, l'associacion Pour Que Vivent Nos Langues presentè son iniciativa dins l'encastre de la campanha de las Presidencialas 2027, a la Ciutat internacionala de la lenga francesa a Villers-Cotterêts.
Aquí lo comunicat :
« En efièch, es al castèl de Villers-Cotterêts que François Ier signèt, en 1539, l'ordenança fasent obligatòria l'usatge del francés en plaça del latin dins los actes de l'administracion e de la justícia. Coma indicat sul sit internet de la Cité internationale, dins la rubrica À la découverte des langues régionales, l'istòria a puslèu retengut lo tèxt coma la debuta de l’ascension del francés al prejudici de las lengas regionalas.
Dempuèi, los governaments successius an pas agut de cèssa, sustot pel biais de politicas centralizatoras e dominatritz, d'establir una ierarquia entre lenga francesa e lengas ditas « regionalas », relegant atal lo.a.s locutor.a.s de las lengas autoctònas a de ciutadan.a.s de segonda zòna, mentre que, totjorn segon lo meteis sit internet, de nombrosas lengas son parladas sul territòri nacional dempuèi mai longtemps que lo francés.
L'imatge de las lengas regionalas e lor rapòrt de dominacion pel francés que torna la Cité simboliza la relacion que l'Estat contunha d'entretenir amb elas. Son per el un objècte museal que se pòt daissar dormir mentre que deuriam aver l'obligacion de menar una politica ambiciosa de revitalizacion, aquela politica relevant d'un dever de reparacion istorica.
L'associacion Pour que vivent nos langues considera que las lengas ditas « regionalas » devon trobar tota lor plaça dins los territòris ont son istoricament practicadas e poder servir dins totes los actes d'una societat modèrna, sustot dins lo domeni administratiu.
Es lo messatge que portarà la delegacion del 26 de setembre, data de la jornada europèa de las lengas qu'a sustot per objectiu la salvagarda del patrimòni lingüistic e de la diversitat de las lengas regionalas o minoritàrias.
Solament, França constituís una excepcion dins una Euròpa ont d'unes païses an mantuna lenga oficiala. Al despièch d'avançadas legalas, es totjorn una politica globala d'exclusion e de regression qu'es menada al respècte de sa diversitat lingüistica sustot per una lectura restrictiva de l'article 2 de la constitucion (la lenga de la Republica es lo francés).
Es dins aquel contèxt fòrça desfavorable per nòstras lengas (totas son, segon l'Unesco, en dangièr de disparicion) e dins aquel luòc e a aquela data simbolics que Pour que vivent nos langues vos convida a la presentacion de sa campanha d'interpelacion del.a.s candidat.a.s a las Presidencialas 2027. »