Farem dins aquesta cronica aqueste mes una pausa pichona dins l'exploracion de la toponimia dels limits (que retrobarem lo mes que ven) per vos presentar lo Manual pichon del toponimista occitan de Joan Rigosta qu'es plan lèu vengut un obratge de referéncia a la portada de totes.
Joan Rigosta nasquèt dins una familha carcinòla en 1938. A totjorn parlat occitan amb sos parents.
Agregat de Letras classicas e titular d'un DEA de geografia istorica, a ensenhèt lo francés e l'occitan. Animèt tanben de corses d'onomastica e escriguèt d’articles sus la toponimia.
Son Manual pichon del toponimista occitan es pas tan pichon puèi que compta mai de 300 paginas.
Inicialament redigit en occitan, espeliguèt fin finala en francés a las edicions Novelum - IEO Perigòrd.
A doas grandas partidas. La primièra presenta los diferents tipes de toponims (apelatius, noms de personas, idronims, oronims, agionims...) puèi indica las sorgas utilas a la recèrca aital coma los metòdes per la menar.
Dins una segonda partida s'estaca a mostrar que los noms dels luòcs an una istòria, de còps fòrça anciana e qu'an un sens e mai se aqueste nos escapa de còps que i a uèi o que s'es alunhat del sens original a causa d'alteracions o de remotivacions.
Los capítols dedicats als determinants e a la sufixacion presentan amb clartat, tablèus sintetics per far prodèl, los mecanismes que presidisson a la construccion de fòrça toponims.
De mai, l'obratge es ondrat d'un vintenat d'enigmas toponimicas que lo legidor s'amusarà a temptar de las resòlvre (las responsas son a la fin del libre), que pontuan la lectura de respiracions ludicas.
Aquel obratge fòrça complèt e plan bastit, que demòstra que la toponimia es una "sciéncia-pont" amb plan d’autras disciplinas, serà util a totes los que s'interèssen als noms de luòcs occitans, amators curioses coma toponimistas aguerrits.
Jean Rigouste : Petit manuel du toponymiste occitan. Périgueux : Novelum – IEO Perigòrd, 2022. 333 paginas.
Isabèla Collomb