Una primiera per lu Lemosin
Lo Diplòma de competéncia en lenga (DCL) occitan es un diplòma d'Estat. S'agís d'una certificacion professionala que permet a tot locutor de l'occitan, quau que siá son nivèu, de far certificar sas competéncias en lenga occitana, confòrmament au quadre europèu comun de referéncia per las lengas (CECRL). Creat en 2010, daus centres d’examen existen per lu moment a Bordèu, Tolosa, Montpelhier e Niça. Après mai d’un mes de negociacions entre l’Ofici public de la linga occitana e lu Rectorat de Limòtges, un centre d’examen dau DCL occitan va drubir à Limòtges, jos resèrva d’un minimum de 8 inscriuts. Entau poirà aculhir los candidats de dialecte lemosin.
Una ajuda de l’OPLO per respondre a una demanda daus actors economics, sociaus e culturaus
Mentre que 66% de la populacion de las regions Novèla-Aquitània e Occitània declaran compréner la linga occitana (sorsa : enquesta sociolingüistica 2020), los usatges sociaus e professionaus de la lenga demòran una realitat quotidiana. Dempuèi mai d’annadas, l'Ofici public de la linga occitana (OPLO) acompanha las organizacions economicas, socialas e culturalas dins una demarcha de certificacion de las competéncias comunicacionalas en occitan de lors actors.
Concrètament, l'Ofici pren en charja 80 % daus fraisses d'inscripcion a l'examen dau DCL. Lo dispositiu concernís aitant plan los salariats e las salariadas, coma los demandaires e demandairas d'emplec, los estudiants e estudiantas, los estagiaris e estagiàrias en formacion professionala que los titulars e titularas en formacion continua, a partir dau moment que s'inscriven dins ‘quela demarcha professionala.