Lo collòqui avenidor dels Joves Cercaires en Domeni Occitan se tendrà los 4 e 5 de junh de 2025 a l’Universitat Pau Valèri - Montpelhièr 3. Es lo moment de transmetre vòstras proposicions de comunicacions !
Lo segond collòqui de l’associacion JCDO a per vocacion de questionar los joves cercaires sus las problematicas de “La lenga e la cultura occitanas a la crosada de las societats”.
Lo collòqui es obèrt en prioritat als estudiants (Master 2 e doctorantas/doctorants) e a las joves doctoras e los joves doctors fins a sièis ans après la sostenença.
Aquel encontre a per tòca d’aculhir dins aquel encastre de reflexion de questionaments divèrses, sortits de camps disciplinaris variats. Las comunicacions poiràn atal portar sus d’aspèctes lingüistics, literaris, istorics, pedagogics, sociolingüistics, etc. d’un punt de vista sincronic o diacronic. Un apròchi comparatiu amb d’autres domenis lingüistics romans e/o non romans es encoratjada.
Las proposicions de comunicacion devon èsser depausadas en linha abans lo 15 de genièr de 2025.
Notificacion d’acceptacion : a la fin de febrièr 2025.