La DGLFLF, lo LIMSI-CNRS e ELDA qu’organizèn los 19 e 20 de heurèr a Meudon un collòqui qui avè lo tèma deu desvolopament de las tecnologias tà las lengas regionaus de França.
Los organizators que partín deu constat que las avançadas en mestior de tractament automatic de las lengas ne pertòcan pas qu’1% de las lengas parladas en lo monde, dont, sustot en França, chic de lengas regionaus.
Totun exemples que n’avem (lengas basca e catalana en Espanha entre autas) qui ns’ensenhan que, per tant que i aja la volontat politica, lo saber scientific e lo saber-har tecnic, que’s pòt desvolopar lèu tecnologias de las agudas tau tractament de las lengas regionaus, en hornir-las deus utís e ressorsas de qui cau.
Que permèt de dinamizar las recèrcas fondamentaus tà çò de las lengas e de har rampèu au desfís de la mesa en plaça d’un vertadèr multilingüisme qui hè compte de las varietats dialectaus, en permetent lo desvolopament d’aplicacions a valor hornida tà las collectivitats locaus.
Aqueth collòqui, qui amassè un seishantenat de participants, dont representants de la DGLFLF, de las collectivitats territoriaus, d’oficis tà las lengas regionaus, en França e Euròpa, qu’avè tres objectius :
- har un constat deu desvolopament des las tecnologias actuaus ;
- amuishar los exemples de desvolopament tà divèrsas lengas ;
- perpausar solucions realistas entà portar remèdi a las mancas identificadas.
Au demiei deus intervienents, Gilabèrt Mercadièr (President deu Congrès) e Aura Séguier (Webmèstra deu Congrès) que presentèn la huelha de rota 2015-2019 de desvolopament numeric de l’occitan.
Marianna Vergez-Couret, deu laboratòri CLLE-ERSS (Universitat Tolosa-Joan Jaurès) qu’expausè los sons tribalhs d’etiquetatge morfosintaxic de còrpus en lenga occitana (hèit dens l’encastre deu programa ANR Restaure).
Pierre-Aurélien Georges (Thesòc, Universitat de Niça) que presentè desvolopaments arron lo tractament de las ressorsas sintaxicas.
Enfin, ELDA que presentè lo son inventari de las ressorsas numericas tà las lengas de França hèit en aliança dab la DGLFLF ; aqueth rapòrt qu’a tanben un estudi de factibilitat de desvolopament d’utís (traduccion automatica, sintèsi e reconeishença vocau, correccion ortografica), comprés l’occitan.
Aqueth collòqui que s’acabè per taulas redonas on se vedó un consensus tà çò de la necèra d’apròchi globau tà totas las lengas, deus escambis (informacion, mutualizacion, transferiment de tecnologias) e de las collaboracions pròchas enter los divèrs actors (DGLFLF, collectivitats, oficis, comunautat scientifica, operators) de qui cau har l’encastre formau. Qu’an previst collòquis mei entà har córrer lo plan de desvolopament numeric tà las lengas de França.
Tà'n saber mei : http://tlrf2015.sciencesconf.org
Totas las intervencions deu collòqui qu'estón filmadas. Que las podetz arretrobar a l'adreça http://webcast.in2p3.fr/events-tlrf.