« Se remembra quand arribèt al vilatge, qu’aviá tant de vam et de projèctes... Qu’es aquò que se’n virèt mal ? »
Èra la frasa de partença per la vint-e-cinquena edicion del concors de novèlas del Lecteur du Val ! Amb la frasa çai sus (en francés o en occitan) coma ponch de partença obligat e la data del 9 de febrièr de 2023 coma darrièr ponch d'arribada.
Coma las annadas precedentas, lo Lecteur du Val (associacion de bibliotècas de Lauragués) prepausa un concors d'escritura de tèxt cort, dobèrt a totes e :
- començant per la frasa çai sus, que deu servir de fil conductor. Se pòt redigir lo tèxt tanben en occitan (veire lo reglament especific per l'occitan)
- de 15 000 signes maximum (pas mai de 6 paginas, 30 linhas per pagina, polissa classica còs 12), rècto simple, numerotadas, agrafadas, non signadas, e un títol obligatòriament ;
- a enviar (en 6 exemplars pels tèxtes adults o 4 exemplars pels tèxtes joves) al pus tard lo dijòus 9 de febrièr de 2023 per corrièr postal a l'adreça :
Lecteur du Val - 27, rota de Sent Lon (route de Saint-Léon) - 31450 NAVELHAS - FRANÇA (NOUEILLES - FRANCE)
- d'unas bibliotècas del malhum accèptan tanben lo depaus (s'assabentar de per abans).
De notar : Seràn dividits los participants en cinc categorias (adults, joves licèu, joves collègi, mainatges, occitan). Pas cap de mencion de nom o de pseudonim suls tèxtes, oblidar pas de jónher lo bulletin de participacion qui aurà lo nom, prenom, edat, adreça, telefòn, corric e categoria de participacion, aital coma lo títol de la novèla e las entresenhas sus lor establiment pels participants escolars. Los tèxtes melhors seràn publicats (e/o enregistrats pels tèxtes en occitan) e lors autors recebràn divèrses lòts e presents.
A prepaus del concors en occitan
En seguida a la capitada creissenta de la categoria occitana prepausada dempuèi dètz ans (18 tèxtes recebuts la primièra annada, 80 en 2021), la possibilitat de participar tanben en occitan es plan segur reconducha aquesta annada, gràcias a una associacion amb la Calandreta de Castanet e l'associacion La Veu dels països catalans. Totas las variantas de la lenga d'òc son las benvengudas - a carga, pel participant, de passar l'incipit dins sa pròpria varianta d'escritura. En mai, a l'edicion dels tèxtes seleccionats per la jurada s'ajustarà la realizacion d'un cd-audio contenent los melhors tèxtes occitans recebuts.