« Lo bordièr se palfiquèt. Las vacas l’agachavan fixament. Dins la nuèit, un can jaupèt. »
Es la frasa de partença per la vint-e-sieisena edicion del concors de novèlas del Lecteur du Val ! Amb la frasa çai sus (en francés o en occitan) coma ponch de partença obligat e la data del 8 de febrièr de 2024 coma darrièr ponch d'arribada.
Coma las annadas precedentas, lo Lecteur du Val (associacion de bibliotècas de Lauragués) prepausa un concors d'escritura de tèxte cort, dobèrt a totes e :
- començant per la frasa çai sus, que deu servir de fil conductor. Se pòt redigir lo tèxte tanben en occitan (veire lo reglament especific per l'occitan)
- de 15 000 signes maximum (pas mai de 6 paginas, 30 linhas per pagina, polissa classica còs 12), rècto simple, numerotadas, agrafadas, non signadas, e un títol obligatòriament ;
- a enviar (en 6 exemplars pels tèxtes adultes o 4 exemplars pels tèxtes joves) al pus tard lo dijòus 8 de febrièr de 2024 per corrièr postal a l'adreça :
Lecteur du Val - 27, rota de Sent Lon (route de Saint-Léon) - 31450 NAVELHAS - FRANÇA (NOUEILLES - FRANCE)
- d'unas bibliotècas del malhum accèptan tanben lo depaus (s'assabentar de per abans).
De notar : Seràn dividits los participants en cinc categorias (adultes, joves licèu, joves collègi, mainatges, occitan). Pas cap de mencion de nom o de pseudonime suls tèxtes, oblidar pas de jónher lo bulletin de participacion qui aurà lo nom, prenom, edat, adreça, telefòn, corric e categoria de participacion, aital coma lo títol de la novèla e las entresenhas sus lor establiment pels participants escolars. Los tèxtes melhors seràn publicats (e/o enregistrats pels tèxtes en occitan) e lors autors recebràn divèrses lòts e presents.
Partenariat amb lo CNRS e Lo Congrès
Coma per las annadas passadas, coma o es precisat dins lo règlament, « los candidats [...] accèptan que lors tèxtes (jos forma perfèctament anonima, plan solid) [...] pòscan tanben servir d’espleitacion scientifica dins lo cas d’un encastre partenarial amb lo CNRS o Lo Congrès permanent de la lenga occitana. »
Permetrà aital d'enriquesir mai e mai lo còrpus de lenga escricha e audio en quantitat e diversitat, e ajudarà a far mai presenta la lenga en lo maine numeric.