Patrici POJADA publica a las edicions IEO Arièja lo Diccionari toponimic d’Arièja ; Noms de comunas, masatges, montanhas, rius e païses.
La publicacion del diccionari toponimic d’Arièja tapa un void ja que i aviá pas cap de trabalh recent sus la toponimia de l’ensemble de las comunas d’Arièja que se poguèsson comparar amb los que foguèron publicats endacòm mai, dempuèi lo de Miquèu Grosclaude sus Bearn (1991) entrò lo de Dordonha paregut en 2020, coeditat per Novelum e lo Congrès.
Destinat a un public grand, qu’aqueste obratge ofrisca un recuèlh de las formas ancianas del nom de cada comuna mas tanben d’unes masatges, noms de montanha, rius e païses (Coserans, Savartés, etc.) n’es un interès màger coma o es que ne sintetize e discutisca las ipotèsis etimologicas, e, al lum de tot aquò, que prepause una forma grafica occitana que pòsca, al còp, tenir compte de l’istòria del nom del lòc e s’adaptar a la realitat locala.
L’obratge se duèrp per una introduccion que presenta los enjòcs de la toponimia e los problèmas que pausa. Tanplan compren la lista de las fonts e de la bibliografia utilizadas que constituïsson un vertadièr instrument de trabalh pel lector. Lo libre es completat de biais util per un glossari dels tèrmes lingüistics emplegats dins las fichas dels toponims estudiats.
L’autor, Patrici Pojada, es professor de las Universitats. Istorian, tanben trabalha sus la lenga occitana dempuèi mai de trenta ans. Li devèm, entre d’autres, L’occitan parlé en Ariège (1992 ; 2001) en collaboracion amb Jordi Deledar, un diccionari occitan-catalan e catalan-occitan (2005) en collaboracion amb Claudi Balaguer, lo primièr memento de conjugason occitana, Los vèrbs conjugats que ne son a la cinquena edicion, o encara lo Repertòri toponimic de las comunas de Miègjorn-Pirenèus (2009). En mai, es membre de l’Acadèmia aranesa de la lenga occitana, del Conselh lingüistic del Congrès permanent de la lenga occitana, de l’Institut d’Estudis Catalans coma tanben del Conselh Nacional de las Universitats dins la seccion de las culturas e lengas ditas regionalas.