Lo projècte de recèrca PaRL – Patrimoine Régional Linguistique (en Nouvelle-Aquitaine) qu'a creat ua platafòrma en linha on los locutors e locutoras de las lengas regionaus de Navèra Aquitània que pòden contribuar a la documentacion, a la preservacion, e a l'aviada d'aqueras lengas.
L'objectiu d'aqueth projècte de recèrca qu'ei de documentar au mei plan lo Patrimòni Lingüistic associat a la Region Novèla Aquitània, dens un contèxte d'evolucion de las nostas societats cap a un foncionament plurilingüe on se costejan dens un quite environament lengas dab estatuts plan variats.
La region Novèla Aquitània que horneish un terrenh experimentau de tria, en har aparéisher ua grana diversitat lingüistica, enter la lenga d'estat qu’ei lo francés, e mei d’ua lenga regionau dab estatuts e representacions sociaus plan diferentas :
- Las varietats de basco ;
- Las varietats d'occitan ;
- Las varietats de peitavin-santongés ;
- Los parlars deu creishent ;
- Shens comptar tots los efèits de contacte enter aqueras lengas, qui balha per exemple l'existéncia d'un francés dit regionau (lo francés e las soas variacions).
Entad aquò har, mantua enquèsta (en linha) que se van succedir sus aquera platafòrma en linha, dab la tòca de :
- Documentar mei plan los usatges e las lors variacions en çò deus locutors e locutoras ;
- Estudiar au nivèu sociologic e culturau associat a çò qui representa lo vòste parlar e la vòsta cultura ;
- Estudiar los enjòcs pedagogics, quitament de politica educativa associada au vòste parlar.
Aquera platafòrma que'vs permet donc, com locutor o locutora, de contribuir a la documentacion, a la preservacion, e a l'aviada d'aqueras lengas. Entad aquò, qu’avetz sonque de crear un compte, puish de respóner a las enquèstas qui son dejà disponiblas, o qui vieneràn enriquir progressivament aquera platafòrma.
Aquera platafòrma que serà en seguir completada per un aprè qui permet de visualizar las variacions d'usatge dens la region en fòrma de cartas lingüisticas, çò qui’vs permeterà a tèrme de poder visualizar aqueras variacions e de las comparar a las vòstas quitas contribucions.
- Accedir a las enquèstas
- Entà mei de detalhs suu projècte de recèrca PaRL, que podetz consultar lo lor site ací.