Los darrièrs dos volums del Diccionari francés-occitan segon lo lengadocian de Cristian Rapin son a mand d'èstre publicats. Lor parucion en cò d'IEO-edicions es prevista per l'auton de 2013. Podètz reservar aqueles tòms e beneficiar d'una ofèrta de soscripcion fins al 15 de setembre.
Lo Diccionari francés-occitan segon lo lengadocian es l'òbra d'una vida. Los cinc primièrs volums presentavan ja un vocabulari ric completat amb citacions de l'autor o extrachas de la literatura occitana. Lo volum 6 (letras R – S), e lo volum 7 (letras T – Z) contunharàn dins aquela dralha. Acabaràn atal un dels diccionaris francés-occitan mai grands e mai complets.
A l'escasença de la parucion d'aqueles dos volums, IEO-edicions vos prepausa de recebre los obratges tre lor publicacion gràcias a una soscripcion. Podètz crompar los tòms 6 e 7 d'aquel diccionari per 70 euros. Mas l'ostal d'edicion prepausa tanben una promocion pels que volrián crompar tota la colleccion : 90 euros pels cinc primièrs volums, 70 euros pels dos darrièrs. Lo bulletin de soscripcion se pòt telecargar sul site de l'IEO.