La tèsi d'Isabelle Collomb, toponimista al Congrès, es d'ara enlà accessibla en linha.
Es estada realizada jos la direccion de Hervé Lieutard e sostenguda a l'Universitat Pau Valèri a Montpelhièr lo 5 de decembre de 2024.
Lo còr d'aquel estudi de microtoponimia del Pargue natural regional dels Causses de Carcin (PNR-CQ) es un diccionari « rasonat » e doncas tematic que repertòria e recensa mai de dètz mila toponims e microtoponims tant usitats coma passats d’usatge.
Cada nom es tractat de faiçon a ne balhar una vision d'ensemble que compren una analisi linguistico-topografica aumentada cada còp qu'aquò es estat possible d'elements de discussion que reprenon las glòsas de nòstres predecessors e ofrisson tanben a l'escasença de las citacions, d’illustracions, de nòtas arquitecturalas, anecdoticas o legendàrias, qu'an per mira d'enriquir la perspectiva que n'es prepausada.
Aquel diccionari es precedit d'un volum que repren dins de capítols dedicats los elements mai notables d'aquela microtoponimia caussenarda : zootoponimia, idronimia, nocion de frontièras, luòcs d'acuèlh, preséncia de la vinha, etc. per tal de ne revelar las especificitats.
Las metodologias aplicadas tot lo long de las doas partidas d'aquel trabalh son estadas elaboradas a partir del quite còrpus toponimic per tal d’ensenhar coma los noms de luòcs del PNR son a l'encòp lo rebat d'un territòri natural particular, e de la faiçon de la quau es estat faiçonat pels òmes al fil del temps, e coma tanben s'inscrivon dins la toponimia e la lingüistica occitanas e mai largament, romanicas.