Se pòt inscriure al màster Estudi e Valorizacion dels patrimònis OCcitan e CAtalan (EVOCA) de l’universitat Tolosa-Joan Jaurés, dins l’encastre de la campanha de candidatura nacionala Mon Master fins al 24 de març.
Aquel màster, prepausat en presencial e en distancial (dispositiu EVOCA-D), permet a tota persona eissida de licéncias d’occitan o de catalan o tot simplament fòrça interessada per l’una d’aquelas lengas-culturas o las doas, de s’especializar dins un domeni de recerca o dins la gestion culturala.
L’estudiant recep aital una formacion sus las airas occitana e catalana e aquerís de competéncias transversalas, çò que li permet, dempuèi son especialitat lingüistica, de melhor comprene los enjòcs e las possibilitats de promocion del patrimòni passat o present d’una o de las doas lengas-culturas.
Aital, dempuèi 2021, los 52 estudiants qu’an seguit aquel mastèr unic en França e en Espanha an pogut :
- desvolopar de subjèctes de recerca sus la lenga (sociolingüistica, dialectologia), la cultura (literatura, fotografia, teatre, etc.), al crosament sovent de questions societalas coma l’identitat minorizada o los estudis de genre, per exemple ;
- o pensar de projèctes de valorizacion del patrimòni (organizacion d’un festenal de contes, creacion de contenguts sus las rets socialas, traduccion per videojòcs, desvolopament toristic en local o a l’internacional) qu’an pogut far dialogar amb lors estagis professionalizants (administracions – region Occitània, conselh general de Tarn, delegacion de l’Institut Ramon Llull…– , oficis de torisme, musèus, mediatècas, archius, entrepresas privadas audiovisualas e radiofonicas, salas d’espectacles – Palau de la Música Catalana… –, associacions culturalas, tèrç-lòcs – La Ciutat a Pau, La Topina a Tolosa… –).
L’equipa pedagogica, compausada d’ensenhaires-cercaires aital coma de professionals del patrimòni e de la gestion culturala, a mes en plaça un ensenhament de proximitat per ajudar los estudiants a optimizar lors sabers e saber-far, e a aprofechar al melhor aquel diplòma EVOCA dins lor trajècte professional e personal.
Poiretz descobrir çai jonch lo programa d’aquel mastèr, matèria per matèria. Avètz egalament accès a de presentacions generalas sus aquestas doas paginas del sit de l’universitat Tolosa-Joan Jaurés (UT2J) : https://www.univ-tlse2.fr/accueil/formation-insertion/master-etude-et-valorisation-des-patrimoines-occitan-et-catalan-evoca e https://occitan.univ-tlse2.fr/accueil/les-formations/master-evoca
Una reünion virtuala d’informacion suls màsters de l’UT2J es programada dijòus 6 de març de 2025 de 18h a 20h. Çai trobaretz las informacions sus aquela serada :
- 18h-18h45 - Conferéncia introductiva : construire son projècte e preparar sa candidatura per estudiar en màster dins l’acadèmia de Tolosa.
- 18h45-20h - Presentacion dels màsters (en 2 sesilhas : 18h45 e 19h15) : s’informar sus las formacions consideradas e escambiar amb las equipas pedagogicas.
Lo ligam Zoom per un rencontre amb los responsables del màster EVOCA en segonda partida es lo seguent.