Lo Conselh regionau d'Aquitània, au parat de la Comission permanenta deu 2 de març passat, que tornè afirmar lo son sostien a la lenga occitana. Despuish 2004, la Region qu'ei engatjada dens ua politica lingüistica volontarista sus l'ensemble deu son territòri.
La Region que hè de l'ensenhament e de la formacion un enjòc capitau d’aquesta, en sostienent organismes com lo CFP'Òc, Calandreta o Òc-Bi. Que tribalha de cap a estructurar un hialat de cors taus adultes a l'escala regionau e interregionau, dab la tòca de favorizar l'alfabetizacion deus locutors passius e de formar navèths locutors. Tà har pujar lo nombre de mainatges occitanofònes, que s'investeish dens la produccion d'utís pedagogics e dens l'informacion de las familhas sus las auhèrtas d'ensenhament.
Tà socializar l'occitan, qu'ajuda tà que sia present dens los mèdias e sus Internet, en acompanhant per exemple ÒC Prod, Conta'm o la FIMÒC. Que sostien tanben l'InÒc Aquitània dens las soas missions de difusion de la lenga.
D’auta part, aquera politica deu Conselh Regionau que sostien Lo Congrès, organisme interregionau de regulacion de la lenga occitana, dont lo sièti ei situat en Aquitània.
Au delà d'aqueras decisions presas en Comission permanenta, l'amassada plenària deu 15 de deceme 2014 qu'avè dejà recondusit, tà l'annada 2015, lo plan de politica lingüistica publica concertada de 2011-2014.
Que'n podetz saber mei suu site de la Region Aquitània.