Lo Parc Naturau Marin deu Bacin d'Arcaishon que prepausa d'ara enlà un atlàs interactiu qui permet de descobrir la localizacion e l'etimologia deus noms deus sons espacis maritimes.
Aqueth atlàs qu'ei prepausat e coordinat peu geografe Pierre Decoudras. Lo tribalh de lingüistica (toponimia) qu'estó realizat per Bénédicte Fénié, doctora en geografia istorica, dab la collaboracion de Francis Pedemay, autor engatjat d'obratges suu gascon.
Que contribuèn tanben ad aqueth projècte : Jean-Marie Blondy, Thierry Cahuzac, Jean Mazodier, Jean-Claude Pesseyre, Adeline Plègue, Jean-Claude Riehl, Jean-Marie Daugé, los « ancians » deu Senat de la Mar a Gujan, Jean Lacoste, « Pépé » Legrand, Michel Lacaze.
Los espacis maritimes que pòden portar noms qui hèn referéncia au contèxte geografic o morfologic, autes que pòden designar ua ressorsa o ua practica. Los noms que pòden evocar ua persona, ua familha, o enqüèra un episòdi memorable ligat a la navigacion dens las passas perilhosas abans d'aténher lo « refugi » d'Arcaishon.