Se presentèc eth 16 de seteme passat en Betren eth diccionari castelhan-aranés de Frederic Vergés.
Aguest diccionari compde tamb mès de 45.000 entrades en tot amassar eth mès espandit camp semantic possible. En eth que i traparatz ua grana varietat de lexic, mots d’emplec locau e d’emplec generau, mots de d’auti còps, desbrembats pes cambis sociaus o economics que patís, coma totes, era nòsta societat, mès que sajam de reviscolar-les e hèr-les a conéisher as navères generacions, mès tanben mots d’aué, mots dera vida vidanta coma tèrmes tecnics, sabents o literaris. Ena bibliografia senhalam quauques ues des hònts escrites des quaus mo’n’avem servit entà hornir aguest corpus lexicografic. Qu’èm fin finala a remercar era dobla tòca d’aguest diccionari. Era ua, era de remplir en çò de possible bèri uns des vuets lexicaus dera nòsta lengua, e, era auta, era de hòrabandir toti aqueri barbarismes que non n’avem cap de besonh, e deguts per’mor dera influéncia desmesurada des autes lengues, en aguest cas deth castelhan.
Aguest diccionari non sonque avem volut qu’estèsse destinat entà usatgèrs de lengua castelhana o coneishedors deth castelhan senon tanben entàs madeishi aranesoparlants, que coma coneishedors dera predita lengua, se trapen plan soent tamb mancances de lexic occitan.