Dijòus 10 d'octobre, a l'escasença dels encontres del projècte Linguatec IA a Pau, s'inaugurarèt oficialament La Farga numerica, lo portal de las tecnologias de la lenga en occitan editat pel Congrès.
La Farga numerica es una plataforma collaborativa d'accès, de valorizacion, d'escambi e de desvolopament de las ressorsas e dels otisses TAL (tractament automatic de las lengas) e informatics per la lenga occitana. Respond a un besonh identificat de la comunautat e dels desvolopaires per çò que pertòca l'accès a de donadas qualificadas, la mutualizacion de la velha, la coordinacion de las òbras e lo partatge dels desvolopaments.
Inspirada dels espacis de mutualizacion e de collaboracion de la comunautat del logicial libre (distribucions Linux, seguidas logicialas, etc.), La Farga numerica vòl èstre a la convergéncia de las iniciativas. Mercés a son interfàcia evolutiva, ofrís una garba de ressorsas e de foncionalitats de cap als desvolopaires e als contributors : inventari qualificat e actualizat de las ressorsas, fuèlha de rota numerica, estandards informatics adaptats a l'occitan, contacte dels diferents actors e projèctes estructurants, cridas a projèctes, cridas a contribucions, messatjariá instantanèa, publicacions scientificas, velha tecnologica.
Sa tòca es de federar la comunautat de totes los, professionals e benevòles, qu'òbran a constituir las ressorsas e a bastir los otisses que forman lo païsatge del numeric occitan. La Farga numerica lor ofrís un luòc per escambiar, una velha de las actualitats del domeni, una centralizacion de l'informacion... Atal poiràn trobar, dins un meteis espaci, tot çò que lor cal per contunhar a dotar la lenga de las tecnologias que li fan mestièr.
La Farga numerica es eissida del projècte « Linguatec-IA, desvolopament de las coneissenças en intelligéncia artificiala per la numerizacion de l'aragonés, del catalan, del basco e de l'occitan ».
