Abans de préner - com totas e tots ! - un repaus beròi ganhat, l‘equipa deu Congrès que prepara d'ara endavant la rentrada...
A començar per la mesa en plaça de la fasa navèra deu programa de Platafòrma numerica lenga e toponimia occitanas sostienuda per Contracte de plan Estat-Region Auvèrnhe-Ròse-Aups, Novèla Aquitània e Occitània, a saber lo plan de restauracion de la toponimia occitana - tau com previst dens la convencion signada dab l'IGN hant Congrès l'organisme referent entà l'analisi ortografica, la correccion e la restitucion de las fòrmas occitanas de la basa de dadas toponimicas de l'IGN - que va estar fin finau engatjat. La rentrada que permeterà de determinar la metodologia, la planificacion de las accions e la geografia prioritària.
L'equipa deu pòle informatic que serà tanben ahortida e que poirà enqüèra portar mélher los sons esfòrç tà çò de la collècta e lo tractament deus còrpus (monolingües, bilingües e audio transcrivuts), la generacion automatica e semiautomatica de lexics atau com la preparacion de las atrunas.
L'obrador deu DGILO (diccionari generau de la lenga occitana), après ua debuta d'annada consacrada a la mesa en plaça a la configuracion de la platafòrma de redaccion e de l'equipa de tribalh, que prenerà lo son ritme de crotzèra dab lo supòrt deu Conselh lingüistic deu Congrès. Que ns’en sap grat de la riquessa e de la qualitat deu prumèr còrpus d'articles : que s’i parla d'un tribalh lexicografic descriptiu long e complèxe (que cobreish la diversitat de la lenga a partir d’un còrpus eterogenèu) indispensable a l’estudi e a la transmission de la lenga.
Lo programa LINGUATEC-IA, portat per un consòrci transfrontalèr dab lo sostien financèr deu POCTEFA (hons FEDER) qu'entrarà tanben dens ua fasa navèra, dab la presentacion de la Huelha navèra de rota numerica de las lengas deus Pirenèus e lo desvolopament de las ressorsas entà melhorar la traduccion automatica e las tecnologias de la paraula. Lo Congrès qu'arcuelherà d'alhors lo 10 d'octobre vienent dens los sons locaus a Pau un seminari LINGUATEC, on serà metut en linha la Farga numerica, lo noste portau navèth TAL (tractament automatic de las lengas).
Fin finau a la demanda deu CAPÒC e de la comunautat educativa, lo Congrès que va engatjar las òbras d'adaptacion en occitan gascon deu logiciau Scratch, logiciau educatiu plan presat deus ensenhaires permetent de realizar un prumèr apròchi de las mecanicas de desvolopaments informatics.
Que tornaram parlar ja de tots aqueths beròis projèctes, en esperant que’vs desiram un beròi estiu !