Bona annada, urosa e granada per vosautres, los vòstres e la nòstra lenga ! Que l’an novèl vos faga lo camin bèl !
Per 2013, l’an vièlh, parlarem pas dels defècis mas de las avançadas. Se ne caliá mençonar sonque tres d’avançadas, que van dins lo bon sens per la transmission de l’occitan, diriam los articles ganhats, en tirant al jo comun amb de monde de tot latz, dins la lei de refondacion de l’escòla, las duberturas de novèls ensenhaments que sián publics o associatius, escolars o pels adultes e la creacion d’ÒC tele, crane present de fin d’annada.
Per 2014 son pas las esperanças e los vòts que mancan… Aquí tanben se ne caliá mençonar sonque tres diriam mai que mai la ratificacion de la Carta europèa de lengas regionalas e minoritàrias, una vertadièra lèi, de mejans dignes per sa mesa en òbra e enfin una vertadièra campanha de valorizacion per implicar tota la populacion dins la transmission…
E Lo Congrès me diretz. Lo Congrès met a posita de totes aqueles qu'aprenon o utilizan la lenga los apleches, las referéncias que li son fisats o que pòt fargar per facilitar la coneissença e la transmission. La fòrta consulta de son site en 2013 e las contribucions recebudas son la pròva de son utilitat e un encoratjament.
Per 2014, de las realizacions que van espelir, podèm citar tre ara la novèla version del site, un diccionari de locucions, lo multidiccionari occitan francés, lo primièr rag del Basicòt , lexic francés-occitan, lo vocabulari de l’istòria e la presentacion de la relacion grafia-fonia, element indispensable de regulacion e d’unitat, illustrada d’enregistraments per ne facilitar la compreneson e l’aquisicion.
Per clavar, vòli mercejar los que d’un biais o d’un autre pòrtan pèira al trabalh del Congrès e dire que demòra dubèrt a totes los que vòlon ajudar.
Gilbert Mercadier, President del Congrès permanent de la lenga occitana