Lo 10 d’octobre passat que s’amassè a Pau lo consòrci LINGUATEC-IA. Que i son aliats lo Congrès permanent de la lenga occitana, la fondacion basca Elhuyar, l’Universitat Tolosa - Joan Jaurés, l’Universitat de Lhèida, l’Universitat de Perpignan, IKER (CNRS-Universitat de Bordèu), l’Universitat deu Pais basco e lo Govèrn d’Aragon (Gobierno de Aragón) tà desvolopar ressorsas e tecnologias tà las lengas deus Pirenèus (aragonés, basco, catalan e occitan).
Tà l’occitan qu’ei previst de cercar modèles navèths d’intelligéncia artificiau adaptats a las ressorsas feblas de las lengas regionaus, d’enriquir (dab votz navèras, dont votz en occitan aranés) e de melhorar la qualitat de las tecnologias de la votz, de melhorar la traduccion automatica e notadament l’entercompreneson entre l’occitan e lo catalan. A la fin deu programa, que serà publicada ua plataforma de traduccion e de transcripcion automatica de vidèos tà las lengas deus Pirenèus.
En l'amassada deu 10 d’octobre, que’s presentèn las òbras en cors e que’s planifiquèn los desvolopaments a viéner. Lo Congrès que i presentè oficiaument La Farga numerica, la navèra plataforma occitana de las tecnologias de la lenga.
Lo projècte LINGUATEC-IA qu'ei finançat a 65% per l'Union Europèa peu programa Interreg VI-A Espanha-França-Andòrra (POCTEFA 2021-2027). Lo POCTEFA qu'a l'objectiu d'ahortir l'integracion economica e sociau de la zòna frontalèra Espanha-França-Andòrra.
