Aqueste estiu lo Congrès se fa seguir lo quasèrn de vacanças ! D'efièit, avèm previst mantuna novetat per la dintrada e per l'annada escolara a venir.
L'eveniment grand del mes de setembre, serà l'aviada oficiala de Revirada, lo traductor automatic francés-occitan e occitan-francés. Dins sa primièra version, foncionarà per l'occitan gascon e l'occitan lengadocian e tradusirà de tèxtes per copiar-pegar, de documents o de sites web « a la volada ». Una aplicacion pels telefonets, una barra de traducion pels navigators e un empeuton (plug-in) pels CMS son tanben previstes.
Un autre otís màger que sortirà abans la fin de 2022 : lo vèrb'Òc lemosin. Serà la quatrena varietat de l'occitan disponibla dins lo conjugador de vèrbes, après lo gascon, lo lengadocian e lo provençal.
Un pauc mai tard, lo tèrm'Òc del Congrès se cambiarà per venir una vertadièra plataforma d'escambis a l'entorn del vocabulari especializat occitan. Los usatgièrs de la lenga i poiràn dire lors besonhs en lexic per de mots o de tematicas especificas. De lor constat, los lingüistas e lexicografas poiràn escambiar amb los professionals d'un sector per los consultar sul vocabulari ja utilizat.
L'annada escolara 2022-2023 serà tanben l'escasença pel Congrès de tornar organizar sos sites, per far l'accès a totes sos otisses mai clar e mai ergonomic. Lo punt central d'aqueles cambiaments serà una novèla version del dicod'Òc que permetrà, amb una sola barra de recèrca, d'accedir a totas las informacions a l'entorn d'un mot : traducions, conjugasons, expressions, exemples d'utilizacion, sinonimes... A costat d'aquel otís grand public, lo Laboratòri vendrà la plataforma pels professionals de la lenga, amb sas recèrcas avançadas de mots dins los diccionaris e los còrpus. Lo site locongres.org sera reorganizat per permetre de compréner melhor lo trabalh del Congrès e quales otisses respòndon a qual besonh.
D'unes sites « satellites » son tanben en preparacion : un que met en valor lo trabalh del pòle Lenga & societat del Congrès, un pels actors del TAL (tractament automatic del lengatge) occitan, e d'autres que ne vos parlarem lèu lèu. Contunharà lo trabalh de constitucion d'un grand còrpus multimodal per l'occitan (textual monolingüe e bilingüe, audio), que servirà entre autres a desvolopar la primièra reconeissença vocala occitana, la bastison de lexics especializats (tres deurián sortir abans la fin de l'annada), la correcion del Basic per totas las varietats e la reflexion sus la socializacion de la lenga pel biais d'aplicacions pels telefonets.
Se volètz demorar informats sus totes aqueles projèctes, abonatz-vos a nòstra letra d'informacion, a nòstres comptes Facebook, Twitter o Instagram o visitatz regularament la partida Actualitats de nòstre site web.
En l'espèra, vos balham rendètz-vos a las fèstas de Baiona lo dimècres 27 de julhet pel tradicional « Prosei » en occitan. I serà dit per una personalitat que demòra pel moment « secreta », mas sabèm ja que serà un brave moment de convivéncia.
Vos desiram a tots un bon estiu !