Après Revirada (e Apertium, lo traductor libre sul qual es basada), MinT, Kagi, ChatGPT e Google Translate, es Deepl, lo traductor europèu, que se bota a la lenga nòstra. D'efièit, l'occitan fa partida de las 70 lengas que venon d'èstre ajustadas al traductor.
Coma los autres otisses basats sus LLM (larges modèles de lengas), es complementari de traductors a basa de règlas coma Revirada e Apertium.
D'efièit, se los traductors a basa d'intelligéncia artificiala pòdon èstre melhors per adaptar de biaisses de dire o de locucions idiomatics, los traductors a basa de règlas son mai bons per produsir una lenga coerenta e omogenèa quand i a una granda variacion intèrna, e gerisson melhor las varietats. Es lo cas de Revirada, per exemple, que prepausa pel moment de tradusir del francés a l'occitan lengadocian e a l'occitan gascon.
En mai, sèm a vos preparar de novèlas foncionalitats que permetràn de gerir melhor la variacion intradialectala. Ne saupretz mai dins qualques meses !