EDITO del president del Congrès permanent de la lenga occitana :
Avèm una lei utila majencada per un Conselh constitucional que vòl tòrna amodar l’epuracion linguistica.
Sa decision es pas juridica, es ideologica, jacobinassa e ridicula.
L’article 2 pres per pretexte èra contra l'anglés e pas contra las lengas autoctònas per pas dire regionalas.
França, « patria dels dreches de l’òme », mens un, lo drech a sa lenga, va èsser la risada del monde amb aquel afar del refús dels signes diacritics. Caròla e Ibáñez van èsser illegals per un accent, Guilhèm e Kevin tanben benlèu...
Calriá arrestar l’immersion dins las escòlas que la practican en França dins lo public e l'associatiu mas tanben a l’estrangièr dins las escòlas, los collègis e licèus que la practican amb lo francés ?
L’immersion que salva lo francés al Canadà e lo reviscòla en Loisiana ont a tant patit coma nòstras lengas seriá illegala en França ?
Mas i a quicòm de plan bon amb lo rambalh que tot aquò mena.
- La lei votada per una larga majoritat, e mai siá majencada, es una avançada per la reconeissença patrimoniala e per l’ensenhament e va permetre d'alargar l'ofèrta qu’èra a demesir.
- se parla mai que pus de nòstres afars e lo pus sovent en ben.
- lo ministèri de l’Educacion, per far doblidar sas mesuras mortifèras e sas manòbras per la sasina contra la lei, anóncia una mesura demandada e refusada dempuèi 3 ans : tornar valorizar l'opcion facultativa de lenga regionala al bac.
- lo primièr ministre e lo president s'interèssan enfin als nòstres afars e daissan pas mai lo dossièr al sol ministèri de l’Educacion. Sembla ben que, afalconats per las reaccions, li vòlgan téner un pauc lo cabèstre enfin. Èra ben ora.
- se parla de revision constitucionala al pus naut nivèl per cambiar lo mortifèr article 2 de la constitucion.
Alara sabèm ben totes que res es pas ganhat, que tot es a far per una mesa en òbra de la lei, de tala o tala declaracion, sabèm ben que far reconéisser l’immersion, que far cambiar l’article 2 per una revision constitucionala serà pas aisit. Podèm dire çaquelà ara qu’es possible e que cal butar totes amassa per far tombar las estacas.
Lo collectiu Pour Que Vivent Nos Langues, mai que jamai, tòrna mobilizar lo 29 de mai en reaccion a la sasina del Conselh constitucionau e denóncia una fòrma de secutament de las lengas regionalas.
Avètz aquí la lista de las manifestacions dins Occitània tota e mai enlà :
« Per tirar al jòc comun cal de monde de tot latz ».
Gilabèrt Mercadièr, president del Congrès permanent de la lenga occitana.