Lo Collectiu que publiquè un comunicat au parat d’aquesta rentrada escolara entà tornar brembar las accions entinoadas de la soa creacion ençà e contextualizar las soas accions.
Que demanda explicitament « d’urgéncia ua audiéncia auprès deu Ministre de l’Educacion nacionau » atau com auprès de « la Ministra de la Cultura Na Rima Abdul Malak, en seguir deus engatjaments pres per l’ancian Purmèr ministre Jean Castex. »
Los punts abordats a tractar que’n son clars :
« Si lo collectiu e’s fixa objectius a tèrmi mejan e long, ne renóncia pas totun a exigir deu ministre navèth de l'Educacion nacionau mesuras immediatas per l'ensenhament de las lengas regionaus entà enraiar las degradacions quantitativas e qualitativas qui resultan de la politica deu son predecessor :
- baisha alarmanta deus efectius en seguir de la refòrma deu BAC (sonque 129 liceans entà l'especialitat EDS lengas regionaus au BAC 2022, çò qui non compensa pas briga la baisha deus efectius dens las autas modalitats d'ensenhament),
- reculada sus l'usatge de las lengas regionaus aus examens,
- presa en compte insufisenta d'aqueras lengas e de l'especificitat de l'ensenhament bilingüe dens la formacion deus regents e los concors de recrutament,
- sosdotacion orària dens los collègis e licèus associatius en immersion, non aplicacion de la generalizacion de l'auhèrta d'ensenhament tau com ei prevista per l'article 7 de la lei Molac [...] com per la circulara de deceme de 2021... ».
E de brembar en conclusion las contradiccions deu discors de l’Estat sus las valors d’ubertura, de diversitat culturau e lingüistica... qui n’aplica pas suu son quite territòri.