Lo 23 de julhet passat, lo Conselh municipau de Baiona que votè ua deliberacion de reconeishença deu basco e deu gascon com « lengas deu territòri ».
Per Pantxo Etchegaray, conselhèr municipau delegat a la politica lingüistica, « la diversitat lingüistica n’ei pas un luxe, ni ua opcion : qu’ei un enjòc universau, culturau, educatiu, sociau e democratic tà la vila de Baiona e los sons poblants. En participant a sauvar las lengas, que partatjam, que ns’obrim, que’ns hèm ençà e que ns’enriquim shens pèrder arren de si medish. »
La deliberacion que rapèra que l’euskara e lo gascon, e son en dangièr d’extincion segon l’UNESCO e que los tribalhs deus sociolingüistas ensenhan qu’ua lenga a d’aténher 30% de locutors tà’s tirar de la zòna de risc. Per estar simbolic, aqueth vòte qu’afirma la volontat de contunhar ua politica volontarista tà sostiéner la transmission, l’usatge en la vita vitanta e la preséncia en l’espaci public.