Lo pòle Lenga e Societat qu’ei un pòle deu Congrès au servici de las collectivitats, enterpresas, institucions, associacions e individuaus entà’us acompanhar dens los lors projèctes e accions.
Aqueste mes, que’vs prepausam un zoom sus quauques projèctes tant per tant realizats : passejadas toristicas en Bearn, mustra sus l’arquitectura tradicionau deus Pirenèus Atlantics, jòc de societat innovant entà l’aprendissatge de l’occitan.
Tot purmèr, l’ofici de torisme Pau-Pirenèus que prepara la tempora estivenca 2025 en préner en compte la lenga occitana dens la composicion de la soa auhèrta lingüistica, mercés a l’ua de las nostas arreviradas a destinacion de las collectivitats.
Atau, que prepausa d’ara endavant ua version bearnesa de la soa « Passejada urbana », un document qui permet ua visita descobèrta deus monuments màgers, de quauques elements istorics e de l’art de víver dens la ciutat reiau.
- Arretrobatz totas las informacions e documents ligats ací
Puish, lo CAUE 64 que hica en valor lo patrimòni arquitecturau deu departament per la mustra Maisons de pays, deu 9 de mai au 28 de junh 2025 a la mediatèca de Biàrritz.
Aquesta que presenta nau identitats arquitecturaus caracteristicas, representativas de l’abitat tradicionau en Pirenèus Atlantics per fotografias deus ostaus de vilatges e bòrdas isoladas.
Un liberet pedagogic per tipologia arquitecturau que vien completar la colleccion.
Utís vertadèrs de compreneson deu patrimòni bastit locau, lo lor contiengut que permet de gahar lo hiu de quin los ancians e construsivan, dab quins materiaus e perqué. Responsas qui hèn sens uei fàcia a las preocupacions environamentaus actuaus e qui meritan d’estar reïnterpretadas dens las nostas arquitecturas contemporanèas.
Tà concludir, lo Congrès qu’a tribalhat en collaboracion dab Les Jeux du Suricate, editor de jòcs de societat tolosenc, entà crear la version occitana deu jòc Beewiz.
Aqueth jòc de cartas innovant, creat per Michaël Matifas, que partvira los metòdes classics entà apréner las lengas vivas e que permet l’apracticament o l’aprendissatge escriut deu vocabulari, per ua mecanica de jòc subèr-rapida.
Aqueth jòc qu’ei jà estat esprovat dens las classas dab ensenhaires e mainats, alavetz ací qu’avetz ua version inedita en occitan, après l’anglés, l’espanhòu, l’alemand e lo portugués.
- N’esitetz pas a precomandar lo jòc a comptar deu 3 de junh via aqueth ligam
Quin que sia lo vòste projècte, se cercatz d’i integrar occitan entà difusir la lenga dens la societat, n’esitetz pas a contactar lo pòle Lenga e Societat entà’vs har acompanhar :