Dens lo present obratge, un cinquantenat d'universitaris, ensenhaires, cercaires, critics, escrivans e artistas, de nacionalitats divèrsas, que hèn aumenatge a Joan Ives CASANOVA, lo lor collèga e amic.
La diversitat de las contribucions que revèla l'estenuda de la soa òbra en occitan e en francés dens los maines de la critica literària, de la recèrca, de l'ensenhament e de l'escritura.
Vadut a Marselha en 1957, regent en 1978 a Ais de Provença puish a Marselha, destacat en 1982 entà l'animacion de l'ensenhament de l'occitan dens l'Acadèmia de Bocas de Ròse dinc a 1989, doctor de l'Universitat de Montpelhièr en 1990, abilitat a gavidar recèrcas en 1994, mèste de conferéncias a l'IUFM de Corsega a Corte en 1991, puish en 1996 a l'Universitat de Pau e deus País d'Ador on vad adarron professor en 2002. Especialista de las literaturas occitana e francesa, deu sègle XVIau au XXau, de Jean de Nostredame e Robert Ruffi a Frederic Mistral, Max-Philippe Delavouët o Max Roqueta, de Guillaume Apollinaire a Henri Bosco, Robert Marteau, Richard Millet, Jean-Paul Goux, etc., que publiquè libes e articles a fanègas. Escrivan, longtemps secretari deu Pen Club de lenga d'òc, qu'ei, despuish 1982, l'autor de nombrós recuelhs poetics, romans e ensais.
Aqueras mesclanhas qu'estón amassadas per Yan LESPOUX (Universitat Pau Valèri - Montpelhièr III) e François PIC (Associacion internacionau d'estudis occitans, AIEO).
L'obratge que comptarà mei de 500 paginas, au format 16 x 24 cm, brocat dab religadura acartonada illustrada, dab portrèit fotografic blanc e negre en frontispici e mantua creacion plastica reprodusida en colors.